काठमाडौँ । सूर्या र बबी देओल अभिनित प्रतीक्षित भारतीय फिल्म ‘कंगुवा’ शुक्रबारदेखि विश्वव्यापीरुपमा रिलिज हुँदैछ ।
तर, यो फिल्म शुक्रबार नेपालमा भने रिलिज नहुने भएको छ ।
यस फिल्मलाई ए–एट्, डीसीएन र आरआर फिल्म्सले नेपालमा भित्र्याउन लागेका थिए । तर, स्वदेशमै नेपाली फिल्म ‘पूर्णबहादुरको सारंगी’ले ब्लकबस्टर कमाइ गरिरहँदा एक्सनप्रधान ‘कंगुवा’ नआउने भएको बुझिएको छ ।
हरिहर अधिकारी र नीता ढुंगाना स्टारर ‘ह्रस्व दीर्घ’ पनि शुक्रबारदेखि प्रदर्शनमा आउँदैछ । यस फिल्ममा भारतीय कलाकारहरुको पनि अभिनय रहेको छ भने फिल्मलाई लिएर दर्शक उत्साहित छन् ।
स्रोतका अनुसार ‘कंगुवा’का भारतीय वितरकले यसको नेपाल राइट एक करोड २० लाख भारुमा बिक्री गर्न चाहेका थिए ।
महंगो रकममा फिल्म ल्याउनुपर्ने र यसअघि ल्याइएका ‘सिंघम अगेन’ र ‘भुलभुलैया ३’ माथि ‘पूर्णबहादुरको सारंगी’ हावी भएपछि ‘कंगुवा’ नआउने भएको बुझिएको छ ।
