काठमाडौँ । ज्यान मार्ने उद्योग कसुरमा पक्राउ परेका दीपक मनाङे उर्फ राजीव गुरूङ कारागार चलान भएका छन् । काठमाडौं जिल्ला अदालतले मंगलबार उनलाई डिल्लीबजार कारागारमा जेल चलान गरेको हो ।
केन्द्रीय अनुसन्धान ब्युरो (सिआइबी)ले मंगलबार बिहान स्वयम्भू, सानोभर्याङबाट उनलाई पक्राउ गरेको थियो । सिआइबीले उनलाई पक्राउ गरी अदालतका फैसला कार्यान्वयन अधिकारीसमक्ष पेश गरेसँगै उनी जेल चलान भएका हुन् ।
कात्तिक २० गते सर्वोच्च अदालतले गण्डकी प्रदेश सभा सदस्य समेत रहेका मनाङेलाई ज्यान मार्ने उद्योगमा दोषी ठहर गरेको थियो । २०६१ वैशाख ३१ गते ‘चक्रे मिलन’ (मिलन गुरूङ)को हात छिन्ने गरी तरबार प्रहार गरेको घटनामा उनलाई सर्वोच्च अदालतले दोषी ठहर गरेको हो ।
यसअघि नै उनी २ वर्ष ८ महिना जेल बसिसकेका छन् । त्यो अवधि घटाएर बाँकी समय उनी जेल बस्नुपर्ने हुन्छ । मनाङे अब पाँच वर्षमा २ वर्ष ८ महिना घटाउँदा आउने दुई वर्ष चार महिना जेल बस्नुपर्ने हुन्छ । सर्वोच्चको आदेशपछि मनाङे सम्पर्कबिहीन भएका थिए ।
