एजेन्सी । दोस्रो टी–२० अन्तर्राष्ट्रिय क्रिकेटमा दक्षिण अफ्रिकाले भारतलाई ३ विकेटले पराजित गरेको छ ।
टस हारेर पहिले ब्याटिङ गरेको भारतले २० ओभरमा ६ विकेट गुमाएर १२४ रन बनाएको थियो । दक्षिण अफ्रिकाले १९ ओभरमा ७ विकेट गुमाएर १२५ रनको लक्ष्य पुरा गरेको थियो ।
ट्रिस्टन स्टब्सले ४७ रनको अविजित इनिङ्स खेले । कम स्कोर भएको यो खेलमा उनी सर्वाधिक रन बनाउने खेलाडी बने ।
कुनै बेला अफ्रिकी टोली ८६ रनको स्कोरमा ७ विकेट गुमाएर संघर्ष गरिरहेको थियो । पिचले स्पिनरहरूलाई सहयोग गरिरहेको थियो र वरुण चक्रवर्तीले ५ विकेट लिएका थिए ।
यसका बाबजुद पनि कप्तान सुर्यकुमार यादवले फास्ट बलरहरुसँग डेथ ओभर बलिङ गर्ने निर्णय गरे ।
यो निर्णय टोलीका लागि महँगो साबित भयो र स्टब्स र जेरार्ड कुटीज (९ बलमा १९ रन)ले ८ औं विकेटका लागि २० बलमा ४२ रनको अविजित साझेदारी गरे । यहाँ भारतीय स्पिनर अक्षर पटेलको तीन ओभर बाँकी नै थियो ।
दक्षिण अफ्रिकाको यो जितपछि ४ खेलको सिरिज १–१ ले बराबरी भएको छ । यस अघि पहिलो खेल भारतले जितेको थियो । अब सिरिजको तेस्रो खेल बुधबार हुनेछ ।
