एजेन्सी । अस्ट्रेलियाका पूर्व ओपनर डेभिड वार्नर बिग ब्यास लिगको अर्को सिजनका लागि सिड्नी थन्डर्सको नयाँ कप्तानमा नियुक्त भएका छन् ।
उनले क्रिस ग्रीनको स्थान लिनेछन् । फ्रेन्चाइजीले बुधबार राति यो जानकारी दिएको हो । वार्नरले सन् २०११ मा यो फ्रेन्चाइजको कप्तानी गरेका थिए ।
१२ दिनअघि अक्टोबर २५ मा क्रिकेट अष्ट्रेलियाको आचरण आयोगले वार्नरमाथि लागेको आजीवन कप्तानी प्रतिबन्ध हटाएको थियो । सन् २०१८ मा दक्षिण अफ्रिकाविरुद्धको टेस्ट म्याचमा बल टेम्परिङ गरेको आरोपमा उनलाई प्रतिबन्ध लगाइएको थियो ।
वार्नर बाहेक, स्टिभ स्मिथ र क्यामरुन ब्यानक्रफ्ट पनि बल टेम्परिङ मुद्दामा दोषी ठहरिएका थिए, जसलाई एक(एक वर्ष क्रिकेटबाट प्रतिबन्ध लगाइएको थियो । वार्नरले क्रिकेट अष्ट्रेलियालाई प्रतिबन्ध फिर्ता लिन अपिल गरेका थिए ।
कप्तान बनेपछि वार्नरले भने-
थन्डरको कप्तान गर्नु मेरो लागि धेरै महत्त्वपूर्ण छ । म सुरुदेखि नै टोलीको एक हिस्सा थिएँ र अब मेरो नामको अगाडि ुसीु राखेर फर्किन पाउँदा खुसी लाग्छ । म फ्रेन्चाइजको नेतृत्व गर्न र युवाहरूसँग मेरो अनुभव साझा गर्न उत्साहित छु ।
सिड्नी थन्डर टोलीले डिसेम्बर १७ मा आफ्नो अभियान सुरु गर्नेछ । टोलीले यस सिजनको आफ्नो पहिलो खेल क्यानबेरामा एडिलेड स्ट्राइकर्ससँग खेल्नेछ । फ्रेन्चाइजले लिगमा एउटा मात्र उपाधि जित्न सकेको छ । टोलीले सन् २०१५–१६ सिजनमा मेलबर्न स्टार्सलाई हराएर उपाधि जितेको थियो ।
