काठमाडौँ । नेकपा (माओवादी केन्द्र)का अध्यक्ष पुष्पकमल दाहालले भ्रष्टाचार बिरोधी अभियान चलाएकै कारण आफू सत्ताबाट हट्नुपरेको बताउनुभएको छ ।
बिहीवार भक्तपुरमा आयोजित एक कार्यक्रममा बोल्दै उहाँले यस्तो बताउनुभएको हो । उहाँले सामाजिक न्यायको पक्षमा, आर्थिक समस्या समाधानको लागि जनताको पक्षमा काम गरेकै कारण पुराना र ठूला पार्टीहरुले भ्रष्टाचारी बचाउनकै लागि तथाकथित संख्याको बलमा आफूलाई सत्ताच्युत गरेको बताउनु भयो । उहाँले आफूले गरेका कामहरु राम्रोसँग जनतालाई बुझाउने अवसरका रुपमा आफूले लिएको बताउनु भयो । आफूलाई जनताले अहिले धेरै नै माया गरेको महशुस हुने गरेको बताउनु भयो ।
उहाँले भन्नुभयो, ‘हामीले भ्रष्टाचार बिरोधी अभियान चलाएकै कारण, हामीले सामाजिक न्यायको पक्षमा अभियान चलाएकै कारण, हामीले आर्थिक समस्या समाधानको लागि जनताको पक्षमा काम गरेकै कारण पुराना र ठूला पार्टीहरुले भ्रष्टाचारी बचाउनकै लागि तथाकथित संख्याको बलमा हामीलाई बाहिर जान बाध्य पारेका छौँ । यसलाई हामीले दुःख मनाउ गरेका छैनौँ । अब हामी आफूले गरेका काम जनतलाई राम्रोसँग बुझाउने अवसर हो यो । यो अवसरको रुपमा प्रयोग गर्न खोजेका छौँ ।
अहिले देशभर जनताले साँच्चै देशलाई माया गर्ने, जनतालाई माया गर्ने, जनताको मुक्ति र सुविधाकै निम्ति संघर्ष गर्ने पार्टी माओवादी नै रहेछ भन्ने परेको छ । आजकाल मलाई त जनताले एकदम माया गरेको देखेको छु । हाम्रा साथीहरुले मात्रै होइन, सामान्य जनताले पनि, कलाकारहरुले पनि, बुद्धिजीविहरुले पनि । सबैले भन्न थाल्नुभएको छ । अलिअलि त डर पनि लागेको छ । अब नेपालको भरोसा तपाईंमा मात्रै छ, अब आश गर्ने हामीले तपाईंसँग मात्रै हो भन्न थाल्नुभएको छ । यो ठूलो जिम्मेवारीको कुरा हो । जनताले फेरि एक पटक माओवादीलाई हेर्न खोजेको हो । फेरि माओवादीको नेतृत्वमा एक पटक सरकार भयो भने भनेका छन् ।’
अध्यक्ष दाहालले फेरि माओवादीको नेतृत्वमा एक पटक सरकार बनेको हेर्न जनताले चाहेको बताउनु भयो ।
