काठमाडौं । साफ महिला च्याम्पियनसिप फुटबल २०२४ को उपाधि भिडन्तका लागि नेपाल र बंगलादेशले प्रतिस्पर्धा गर्दैछन् । खेल साँझ साढे ६ बजेदेखि सुरु हुनेछ ।
यसै खेलको सुरक्षा र व्यवस्थित वातावरणलाई मध्यनजर गर्दै अखिल नेपाल फुटबल संघ (एन्फा)ले रंगशालामा लैजान नहुने सामग्रीहरूको सूची सार्वजनिक गरेको छ ।
एन्फाका अनुसार बन्दुक, छुरा तथा अन्य धारिला र घातक हतियार, धुम्रपान र आगो बाल्ने सामग्री, चुरोट, लाइटर, सलाइ आदिमा प्रतिबन्ध, मादक पदार्थ, ठूला झोला, साना झोलाहरू मात्र जाँचपछि अनुमति दिइनेछ, तर ठूला झोलालाई निषेध गरिएको छ ।
साथै, सुरक्षात्मक उपकरण हेल्मेट र यस्तै सुरक्षा सामग्री निषेध गरिएको छ भने अनुमति बिना झण्डा, ब्यानर, पोस्टर आदि प्रचार सामाग्री पनि खेल हेर्न जाँदा लैजान पाइने छैन ।
पानीको बोतल, क्यान, पत्थर, धातुका मुद्रा (सिक्का) आदिमा कडाई गरिने छ भने खेलाडी वा रेफ्रीलाई लक्षित गर्ने लेजर लाइट,कुनै पनि प्रकारका लागू औषधहरू र छाता, लिपस्टिक, नेल कटर, कैँची आदिलाई पनि निषेध गरिएको छ ।
नेपाल र भारतबीचको सेमिफाइनलमा अत्याधिक दर्शक उपस्थित भएपछि सुरक्षालाई लिएर एन्फा सजग भएको हो । सो खेलमा दर्शकहरुले पानीका बोतल मैदानमा फाल्दा केही बेर खेल नै अवरुद्ध भएको थियो ।
