काठमाडौं । रोड्रीले फुटबलको सबैभन्दा प्रतिष्ठित अवार्ड बालोन डि’ओर जितेका छन् ।
फ्रान्सको पेरिसमा आयोजित भव्य समारोहमा केहिबेरअघि स्पेन तथा म्यान्चेस्टर सिटीका डिफेन्सिभ मिडफिल्डर रोड्रीलाई २०२३-२४ को बालोन डि’ओर विजेता घोषणा गरिएको हो ।
२८ वर्षिय रोड्रीले ब्राजिल तथा रियल मड्रिडका भिनिसियस जुनियरलाई पछि पारे । रोड्री युरो कपमा प्लयेर अफ द टुर्नामेन्ट तथा प्रीमीयर लिग विजेता बनेका थिए ।
यस्तै, बार्सिलोना र स्पेनकी स्टार आइताना बोनमाटी लगातार दोस्रो पटक महिला बालोन डी’ओर जित्न सफल रहिन् ।
बालोन डी’ओरको विजेता १०० विशेषज्ञ पत्रकारहरुको अन्तर्राष्ट्रिय निर्णायक मण्डलले छनोट गरेको हो । रियल मड्रिडले उक्त समारोह बहिष्कार गरेको थियो ।
२१ बर्षपछि लियोनल मेसी र क्रिस्टियानो रोनाल्डाे दुबै खेलाडीहरु नोमिनेसनमा परेनन् । मेसीले सर्वाधिक ८ तथा रोनाल्डाेले ५ पटक यो अवार्ड जितेका छन् ।
