एजेन्सी । बलिउड अभिनेता सलमान खानलाई धम्की दिएर ५ करोड माग्ने व्यक्ति पक्राउ परेका छन् ।
मुम्बईको वरेली प्रहरीले २४ वर्षीय शेख हुसेन शेख मौसिनलाई झारखण्डको जमशेदपुरबाट बुधबार पक्राउ गरेको हो । उनलाई आज झारखण्डबाट ट्रान्जिट रिमाण्डमा मुम्बई ल्याइएको छ ।
जमशेदपुरका तरकारी विक्रेता शेख हुसेन शेख मौसिनले गत हप्ता मुम्बई ट्राफिक प्रहरीलाई ह्वाट्सएप कल गरेर फिरौती मागेका थिए । उनले आफूलाई लरेन्स गिरोहको सदस्य घोषणा गरेका थिए ।
मुम्बई प्रहरीका एक अधिकारीले भने कि प्रहरीले सन्देश पठाउने व्यक्तिको खोजी गर्न तुरुन्तै अनुसन्धान थालेको थियो । यसैबीच, मुम्बई ट्राफिक प्रहरीले सोही मोबाइल नम्बरबाट माफीको सन्देश प्राप्त गरेको छ । प्रहरीले त्यो नम्बरलाई झारखण्डमा ट्रेस गर्यो र आरोपीलाई पक्राउ गर्न टोली पठाएको थियो ।
मुम्बई पुलिसका अनुसार धम्कीपूर्ण सन्देशमा लेखिएको थियो – ‘यसलाई हल्का रूपमा नलिउ । यदि सलमान खान जीवित रहन र लरेन्ससँगको दुश्मनी अन्त्य गर्न चाहन्छन् भने उनले ५ करोड रुपैयाँ तिर्नुपर्नेछ । पैसा नदिए सलमानको हालत बाबा सिद्दिकीको भन्दा खराब हुनेछ ।’
