पोखरा । सहकारीको रकम हिनामिना प्रकरणमा पक्राउ परेका रास्वपा सभापति रवि लामिछाने र पूर्व डीआईजी छविलाल जोशीलाई कास्की जिल्ला अदालतमा उपस्थित गराइएको छ ।
रास्वपा र सहकारी पीडितको प्रदर्शनले असहज हुन सक्ने भएकाले कार्यालय खुलेसँगै उनीहरुलाई अदालतमा उपस्थित गराइएको कास्की प्रहरीले जनाएको छ ।
गत शुक्रबार काठमाडौंबाट पक्राउ परेका लामिछानेलाई आइतबार अदालतमा उपस्थित गराउँदा पक्राउ परेकै दिनदेखि लागु हुने गरी अनुसन्धानका लागि ६ दिनको म्याद दिइएको थियो । उक्त म्याद सकिएपछि प्रहरीले आज फेरि उनलाई अदालतमा उपस्थित गराइएको हो ।
पोखराको सूर्यदर्शन सहकारीको रकम गोर्खा मिडियामार्फत अपचलन गरेको अभियोगमा रविलाई सहकारी ठगी तथा संगठित अपराधको मुद्दा लगाइएको छ ।
