एजेन्सी । सन् २००१ को जया शेट्टी हत्या प्रकरणमा मुम्बई उच्च अदालतले ग्याङ्स्टर छोटा राजनलाई जमानत दिएको छ ।
उनलाई यो वर्षको सुरुमा दोषी ठहर गरी आजीवन कारावासको सजाय सुनाइएको थियो । तर, अहिले अदालतले उक्त सजायलाई स्थगित गरेको छ ।
न्यायाधीश रेवती मोहिते डेरे र न्यायाधीश पृथ्वीराज चव्हाणको इजलासले उनलाई १ लाख रुपैयाँ धरौटीमा धरौटीमा रिहा गरेको हो ।
अदालतले बुधबार राजनलाई जन्मकैदको सजाय खारेज गर्दै उक्त मुद्दामा जमानत दिएको थियो । यद्यपि, राजन अर्को आपराधिक मुद्दामा जेलमै रहनेछन् ।
जया शेट्टी सेन्ट्रल मुम्बईको गमदेवीमा रहेको गोल्डेन क्राउन होटलकी मालिक थिइन् । मुम्बईको मकोका अदालतका विशेष न्यायाधीश एमएम पाटिलले राजनलाई दोषी ठहर गरेका थिए ।
छोटा राजन गिरोहबाट फिरौतीको धम्कीको सामना गरिरहेकी जया शेट्टीलाई उक्त गिरोहका दुई कथित सदस्यले मे ४, २००१ मा होटलको पहिलो तल्लामा गोली हानेका थिए ।
छोटा राजन गिरोहबाट फिरौतीको धम्की आएको सूचना पाएपछि होटल व्यवसायीलाई प्रहरी सुरक्षा दिइएको थियो । तर आक्रमण हुनुभन्दा दुई महिनाअघि शेट्टीको अनुरोधमा उनको सुरक्षा फिर्ता लिइएको थियो ।
छोटा राजनको नाम राजेन्द्र सदाशिव निकालजे रहेको छ । उनको जन्म १३ जनवरी १९६० मा भएको थियो ।
२३ वर्षपछि आयो फैसला
२००१ मा, जया शेट्टीले फिरौती तिर्न अस्वीकार गरेपछि ग्रान्ट रोडको गोल्डेन क्राउन होटलमा राजनका गुर्गेहरूले गोली हानी हत्या गरे । राजन गिरोहले रवि पुजारीमार्फत जया सेट्टीसँग ५० करोड रुपैयाँ फिरौती मागेको थियो ।
मुद्दाका अन्य अभियुक्त अजय मोहिते, प्रमोद धोन्डे र राहुल पावसरेलाई २०१३ मा दोषी ठहर गर्दै जन्मकैदको सजाय सुनाइएको थियो । यसैबीच, हालै छोटा राजनलाई दोषी घोषित गरिएको थियो ।
उनलाई इन्डोनेसियामा पक्राउ गरी अक्टोबर २०१५ मा भारत ल्याइएको थियो । त्यसयता उनी नयाँ दिल्लीको तिहाड जेल नम्बर दुईमा थुनिएका थिए । यो सेल उच्च सुरक्षा छ । कुनै समय दाउद इब्राहिमको नजिक रहेका छोटा राजन सन् १९९३ को मुम्बई शृंखलाबद्ध विस्फोटपछि दाउद गिरोहबाट अलग भएका थिए ।
