काठमाडौँ । भारतको नयाँदिल्लीबाट काठमाडौंस्थित त्रिभुवन अन्तर्राष्ट्रिय विमानस्थल अवतरण गरेको एक जहाजमा बम राखेको हल्ला फैलिएको छ ।
भारतीय निजी वायुसेवा कम्पनी भिस्टारा एयरवेजको उडान नम्बर ‘यूके १५५’ भएको उक्त जहाज अहिले ‘अनग्राउन्ड’ रहेको छ ।
विमानस्थल स्रोतका अनुसार जहाजमा बम राखेको फोन दिल्लीबाटै आएको थियो । बम राखेको खबरसँगै नेपाली सेनाको कमान्डमा सुरक्षा निकायले जहाजको खानतलासी सुरु गरेको छ ।
पछिल्लो समय भारतीय जहाजहरूमा बम राखेको हल्ला फैलिने क्रम बढेको छ । बमको हल्ला आएको र अहिले सुरक्षा टोली विमानस्थलमा पुगेका छन् ।
काठमाडौं विमानस्थलमा अहिले उडान–अवतरण रोकिएको छ । नेपाली सेना सहितको सुरक्षा निकायले जहाजमा खानतलासी गरिरहेको विमानस्थल स्रोतले जनाएको छ ।
