काठमाडौँ । स्वस्तिमा खड्का र निश्चल बस्नेतको फिल्म ‘बेहुली फ्रम मेघौली’ बुधबार ओटिटी प्लेटफर्ममा रिलिज हुने भएको छ ।
हलमा दर्शकको साथ पाइरहेको अवस्थामा निर्माता–निर्देशक बस्नेतले हलबाट फिल्मलाई उतारेका थिए ।
त्यसको दुई दिनपछि नै ‘एमएसएम भिडिओ’ एपमा फिल्म रिलिज हुन लागेको हो ।
‘एमएसएम भिडिओ’ एप हालसालै संचालनमा आएको हो । छोटो समयमै एपलाई ८० हजार बढीले डाउनलोड गरिसकेको जनाइएको छ । यस एपमा दर्शकले तोकिएको शुल्क तिरेर उपलब्ध फिल्म छनोट गरेर हेर्न सक्नेछन् ।
बस्नेतका अनसार यो फिल्म युट्युबमा भने नआउने भएको छ । आफ्नो अघिल्लो फिल्म ‘दिमाग खराब’ लाई पनि युट्युबमा रिलिज नगरिने निश्चल बताउँछन् ।
फिल्म युट्युबमा रिलिज गरेपछि ओटिटी प्लेटफर्म फस्टाउँदैन भन्ने निश्चलको भनाई छ ।
फिल्ममा निश्चल र स्वस्तिमासहित बसुन्धरा भुसाल, विजय बराल, सिमरन खड्का, लोकेन्द्र लेखक, रक्षा थापा, सिरु विष्ट, आमिर गौतम, टीका पहारीलगायतको अभिनय छ ।
फिल्ममा सजन काफ्ले र आकाश बरालको लेखन तथा निर्देशन रहेको छ ।
