एजेन्सी । मुम्बई पुलिसले प्रसिद्ध निर्देशक–कोरियोग्राफर रेमो डिसुजा र उनकी पत्नी लिजेल डिसुजासहित अन्य पाँच जना विरुद्ध ठगीको मुद्दा दर्ता गरेको छ ।
गत शनिबार एक नृत्य समूहले यो उजुरी दिएको थाने प्रहरीले जनाएको छ । रेमो र उनकी श्रीमती र अन्य सबैमाथि ११.९६ करोड रुपैयाँ ठगी गरेको आरोप छ ।
यसैबीच रेमोले आइतबार साँझ एक विज्ञप्ति जारी गर्दै यी सबै आरोप निराधार भएको बताएका छन् । यसअघि २६ वर्षीया पीडित डान्सरले अक्टोबर १६ मा मुम्बईको मीरा रोड पुलिस स्टेशनमा उजुरी दिएकी थिइन् ।
यस उजुरी अनुसार, नर्तक र उनको समूहमाथि २०१८ जुलाई देखि जुलाई २०२४ सम्म ठगी गरिएको थियो ।
यो समूहले रियालिटी शोमा प्रदर्शन गरेर जितेको थियो । उजुरीकर्ताका अनुसार रेमो र अन्य अभियुक्तहरूले उक्त समूह आफ्नो हो भनी बहाना बनाएर आफूहरुले जितेको ११.९६ करोड रुपैयाँको पुरस्कार रकम हडपेको आरोप छ ।
यस घटनामा प्रहरीले रेमो डिसुजा, उनकी श्रीमती लिजेल डिसुजा, ओमप्रकाश शंकर चौहान, रोहित जाधव, फ्रेम प्रोडक्सन कम्पनी, विनोद राउत, रमेश गुप्ता र अन्य एक व्यक्तिको नाममा मुद्दा दर्ता गरेको छ । घटनाको अनुसन्धान भइरहेको प्रहरीले जनाएको छ ।
