काठमाडौँ । सुर्यदर्शन सहकारीको रकम अपचलनको आरोपमा पक्राउ परेका पूर्वडीआईजी छविलाल जोशीलाई अस्पतालमा भर्ना गरिएको छ । बिसन्चो भएको भन्दै जोशीलाई पोखरास्थित फिस्टेल अस्पतालमा राखिएको छ ।
कास्कीका एसपी श्यामबाबु ओलियाले जोशीलाई अस्पताल बस्न अनुमती दिएका हुन् । ओलिया असोज १४ गते मात्रै सरुवा भएर कास्की पुगेका थिए ।
यसअघि पनि बिसन्चो भएको भन्दै जोशी हिरासत छलेर अस्पताल बस्ने प्रयास गरेका थिए । तर, तत्कालीन एसपी मोहन थापाले उनलाई अस्पताल बस्ने अनुमति दिएका थिएनन् । असोज १५ बाट नै उनलाई अस्पतालमा राखिएको जिल्ला प्रहरी कार्यालय कास्कीका एक जना अधिकारीले बताए ।
जोशी ६ असोजमा काठमाडौं शंखमुलबाट पक्राउ परेका थिए । विभिन्न ५ सहकारीबाट गोर्खा मिडियामा गएको ६५ करोडभन्दा बढी रकम अपचलनमा उनको पनि संलग्नता रहेको भन्दै संसदीय छानबिन समितिले कारबाही गर्न सिफारिस गरेको थियो ।
सोहि प्रकरणमा गोरखा मिडिया नेटवर्कका प्रबन्ध निर्देशक एवम् राष्ट्रिय स्वतन्त्र पार्टीका सभापति रवि लामिछाने पनि पक्राउ परेका छन् । उनलाई आज म्याद थपको लागि कास्की जिल्ला अदालतमा लैजान लागिएको छ ।
