एजेन्सी । यस वर्षको दादासाहेब फाल्के अवार्ड बलिउड अभिनेता मिथुन चक्रवर्तीलाई प्रदान गरिने भएको छ । केन्द्रीय मन्त्री अश्विनी वैष्णवले सोमबार यो घोषणा गरेका हुन् । मिथुनलाई अक्टोबर ८ मा हुने ७०औँ राष्ट्रिय चलचित्र पुरस्कार समारोहमा सम्मान गरिने छ ।
मिथुनले सन् १९७६ मा मृगयाबाट आफ्नो फिल्मी करियर सुरु गरेका थिए । उनले पहिलो फिल्ममा नै राष्ट्रिय पुरस्कार जितेका थिए । उनी सन् १९८२ मा डिस्को डान्सरबाट चर्चामा आएका थिए ।
उनले अहिलेसम्म ३५० भन्दा बढी चलचित्रमा काम गरिसकेका छन् । उनले तीन पटक राष्ट्रिय पुरस्कार पाएका छन् । उनलाई जनवरी २०२४ मा पद्मश्रीबाट सम्मानित गरिएको थियो ।
मिथुन चक्रवर्तीको जन्म १६ जुन १९५० मा कोलकातामा भएको थियो । उनको वास्तविक नाम गौराङ चक्रवर्ती हो । मिथुनले रसायनशास्त्रमा स्नातक गरेका छन् ।
