काठमाडौं । जनमत पार्टीले गौर नरसंहारको जिम्मेवारी लिने तथा आफ्ना नेताको हत्या गर्ने अभिव्यक्ति दिने मन्त्री रेणु यादवलाई तत्काल बर्खास्त गरी पक्राउ गर्न माग गरेको छ । जनमत पार्टीका उपाध्यक्ष दिपक कुमार साहले बिहीबार साँझ प्रेस विज्ञप्ति जारी गर्दै चरम अपराधिक अभिव्यक्ति दिने मन्त्रीलाई बर्खास्त गरी २०६३ सालको गौर नरसंहारमा संलग्न व्यक्तिलाई तत्काल पक्राउ गर्न माग गर्नुभएको हो ।
बिज्ञप्तिमा भनिएको छ – नेपाल सरकारले अपराधिक अभिव्यक्ति दिने, हत्या हिंसा भड्काउन खोज्ने र अर्को नरसंहारको षडयन्त्र रच्ने मन्त्रीलाई अविलम्ब बर्खास्त गर्नुपर्छ । साथै गौर नरसंहारका फरार अभियुक्तहरुलाई सुरक्षाकर्मीले विशिष्ठ सुरक्षा घेरामा राखेर सुरक्षा दिने होइन कि उनीहरुलाई तत्काल पक्राउ गरी नरसंहारका पीडितहरुलाई न्याय दिदै मधेशमा विद्यमान अपराधिक पार्टीको अपराधिक राजलाई समाप्त पार्नु पर्दछ ।
भौतिक पूर्वाधार तथा यातायात मन्त्री रेणुकुमारी यादवले बुधबार ‘बलिदानी दिवस’ का अवसरमा रौतहट सदरमुकाम गौरमा आयोजित कार्यक्रममा २०६३ सालको ‘गौर नरसंहार’ को उदाहरण दिँदै जनमत पार्टीका अध्यक्ष सीके राउतको हत्या हुन सक्ने बताउनु भएको थियो ।
