लन्डन । आइतबार राति इंग्लिस प्रिमियर लिगमा लिभरपुलले लेस्टर सिटीमाथि ३–० को शान्दार जित निकालेको छ ।
यससँगै लिभरपुलले घरेलु मैदान एनफिल्डमा लिगको अपराजित खेल संख्यालाई कीर्तिमान ६४ पुर्याएको हो । जोनी इभान्सको आत्मघाती गोलपछि लिभरपुलका लागि डिएगो जोटाले दोस्रो गोल गरे ।
एनफिल्डमा आफूले खेलेका सबै चार खेलमा जोटाले गोल गरेका छन् । योर्गन क्लोपका लागि रोबर्टो फिरमिनोले तेस्रो गोल गरे र पूर्व लिभरपुल प्रशिक्षक ब्रेन्डन रोजर्सको लेस्टरले कुनै जवाफ फर्काउन सकेन् । यो जितपछि डिफेन्डिङ च्याम्पियन लिभरपुलको २० अंक भएको छ ।
यो शीर्ष स्थानमा रहेको टोटनहमसँग बराबरीको अंक हो । लेस्टर भने १८ अंकमा चौथो स्थानमा रह्यो ।
चेल्सी समान १८ अंकमा तेस्रो स्थानमा छ । चोट र कोभिड–१९ को संक्रमणका कारण लिभरपुलले आफ्ना केही प्रमुख खेलाडी गुमाएर पनि यो उत्कृष्ट जित निकालेको हो ।
