एजेन्सी । अफगानिस्तानका स्टार स्पिनर राशिद खानले विवाह गरेका छन् । राशिदले अफगानिस्तानको राजधानी काबुलमा विवाह गरेका हुन् । अफगान स्पिनरको विवाह पश्तुन परम्परा अनुसार भएको थियो ।
भाइरल भएका तस्विरका अनुसार राशिदले बिहीबार ३ अक्टोबरमा विवाह गरेका थिए । तर, सार्वजनिक भएका तस्बिरमा राशिदकी श्रीमती देखिएकी छैनन्, न त उनको बारेमा कुनै जानकारी नै छ ।
उनको विवाहमा अफगानिस्तानका सबै क्रिकेटर सहभागी भएका थिए । राशिदको विवाहका सबै तस्विरहरु सामाजिक सञ्जालमा निकै भाइरल भइरहेका छन् ।
रिपोर्टका अनुसार राशिदसँगै उनका तीन भाइको पनि विवाह भएको थियो ।
राशिदको विवाहमा अफगानिस्तान क्रिकेट टिमबाट खेल्ने उनका सबै साथी क्रिकेटरहरु सहभागी भएका थिए । बिहेमा टोलीका अनुभवी अलराउन्डर मोहम्मद नाबी पनि देखिएका थिए । यसबाहेक अलराउन्डर अजमातुल्लाह ओमरजाई पनि देखिएका थिए ।
राशिदको विवाहमा नजिबुल्लाह जद्रान, रहमत शाह र मुजीब उर रहमानलगायत अन्य धेरै स्टारहरू देखिएका थिए । अफगानिस्तान क्रिकेट बोर्डका सीईओ नसीब खान पनि राशिदको विवाहमा सहभागी भएका थिए ।
राशिद खान अमेरिका र वेस्ट इन्डिजले आयोजना गरेको टी–२० विश्वकप २०२४ मा अफगानिस्तानको कमान्डिङ सम्हालेका थिए । अफगानिस्तानको टोली कुनै पनि आईसीसी प्रतियोगिताको सेमिफाइनलमा प्रवेश गरेको यो पहिलो पटक हो । अनुभवी रासिदको कप्तानी टोलीका लागि अहिलेसम्म निकै भाग्यशाली साबित भएको छ ।
