काठमाडौं । नेकपा माओवादी केन्द्रले सोमबार प्रतिनिधिसभाको बैठक अवरोध नगर्ने भएको छ ।
कार्यव्यवस्था परामर्श समितिको बैठकमा प्रमुख सचेतक हितराज पाण्डेले प्रधानमन्त्रीको सम्बोधनमा अवरोध नगर्ने जनाएका हुन् ।
माओवादीले एमालेका सांसद योगेश भट्टराईले जनयुद्धलाई होच्याउने, अपमान गर्ने गरी हिंसा शब्द प्रयोग गरेको भन्दै संसद अवरोध गर्दै आएको थियो ।
प्रधानमन्त्री बाहिर भ्रमणमा जाने बिषयमा सदनलाई जानकारी गराउने कुरामा बाधा नगर्ने तर ‘हिंसा’ शब्द रेकर्डबाट हटाउनुपर्छ भन्ने कुरामा आफ्नो पक्ष रहेको सचेतक पाण्डेले बताए । ‘हामी हिंसा शब्द हटाउनुपर्छ भन्ने पक्षमा छौं । तर, प्रधानमन्त्री बाहिर भ्रमणमा जाने बिषयमा सदनलाई जानकारी गराउने कुरामा बाधा गर्दैनौं । हामी सभामुखको विरोधमा छैनौं । आफ्नो कुरा राखेर अवरोध हटाउँछौं’, उनले भने ।
