काठमाडौँ । पोर्चुगलले नेसन्स लिगमा स्कटल्यान्डविरुद्ध २–१ को जित निकालेको छ । कप्तान क्रिस्टियानो रोनाल्डोले करियरको ९०१औँ गोल गरेको खेलमा पोर्चुगल विजयी भएको हो ।
आइतबार राति पाहुना टिम स्कटल्यान्डले सातौँ मिनेटमा अग्रता लिएको थियो । स्कटल्यान्डका स्कट म्याकटोमिनेले हेडर गोल गर्दै पाहुना टिमलाई अग्रता बनाएका थिए ।
५४औँ मिनेटमा ब्रुनो फर्नान्डेजको गोलमा पोर्चुगल खेलमा फर्कियो । खेलको निर्धारित समय सकिन दुई मिनेट बाँकी रहँदा रोनाल्डोले गोल गरेपछि पोर्चुगलले २–१ को जित निकालेको हो ।
स्कटल्यान्ड रोनाल्डोले अन्तर्राष्ट्रिय करियरमा गोल गरेको ४८औँ देश हो । विश्व फुटबलको इतिहासमा रोनाल्डोबाहेक अरू खेलाडीले यति धेरै देशविरुद्ध गोल गरेका छैनन् ।
प्रतियोगितामा लगातार दोस्रो जित निकालेको पोर्चुगल समूह–१ को शीर्ष स्थानमा छ । समान खेल खेल्दा अंकविहीन स्कटल्यान्ड भने तालिकाको पुछारमा छ ।
