काठमाडौं । सत्तारुढ नेपाली कांग्रेस र नेकपा एमालेले सरकारको साझा न्यूनतम साझा कार्यक्रम तयार पार्न कार्यदल गठन गरेका छन् ।
सरकार गठनको दुई महिना पुग्न लाग्दा पनि साझा न्यूनतम् कार्यक्रमसम्म ल्याउन नसकेपछि आलोचना हुँदै आएको छ ।
प्रधानमन्त्री निवास, बालुवाटारमा बसेको कांग्रेस र नेकपा एमालेका नेताहरुको बैठकले कार्यदल गठन गर्ने निर्णय गरेको हो ।
कार्यदलमा नेपाली कांग्रेसका महामन्त्री गगन थापा र प्रकाशशरण महत छन् भने एमालेबाट उपमहासचिवद्वय प्रदीप ज्ञवाली र विष्णु रिमाल छन् ।
सरकारको न्यूनतम साझा कार्यक्रमबारे अरु सत्तारुढ दलहरुसँग पनि छलफल गर्ने निर्णय भएको छ ।
गत १७ असारमा भएको सहमति अनुसार ३० असारमा एमाले अध्यक्ष केपी शर्मा ओली प्रधानमन्त्री नियुक्त भएपनि न्यूनतम साझा कार्यक्रम बनाइएको थिएन ।
