काठमाडौँ । परराष्ट्रमन्त्री डा आरजु राणा देउवाले आज भारतीय प्रधानमन्त्री नरेन्द्र मोदीसँग भेटवार्ता गर्नुहुने भएको छ ।
आज साँझ उहाँहरुबीच भेटवार्ता हुने तय भएको परराष्ट्र मन्त्रालय स्रोतले जानकारी दिएको छ । राणा भारतीय विदेशमन्त्री एस जयशंकरको निमन्त्रणामा भारत भ्रमणमा रहेकी छिन् । परराष्ट्रमन्त्री नियुक्त भएपछि उनी हिजो पहिलो पटक विदेश भ्रमणका रुपमा भारत गएकी हुन् ।
उहाँले आज अपराह्न विदेशमन्त्री एस जयशंकरसँग द्धिपक्षीय भेटवार्ता गर्ने भएकि छिन् । त्यसैगरी सो भेटवार्तापछि उनले आजै साँझ भारतीय प्रधानमन्त्री मोदीसँग भेट गर्ने कार्यक्रम रहेको हो । सो भेटमा नेपाल भारत सम्बन्धका विविधि पक्षमा कुराकानी पनि हुने जनाइएको छ । विदेश मन्त्री राणासँग भेटका लागि भारतीय राष्ट्रपति द्रौपदी मुर्मुसँग पनि समय मागिएको परराष्ट्र स्रोतले बतायो । तर सो भेटका बारेमा भने निश्चित भैसकेको छैन ।
आइतबार नयाँदिल्ली पुगेकी मन्त्री राणालाई इन्दिरा गान्धी अन्तर्राष्ट्रिय विमानस्थलमा भारतका लागि नेपालका कार्यवाहक राजदूत सुरेन्द्र थापा र भारतीय विदेश मन्त्रालयका नेपाल र भुटान डेस्क प्रमुख अनुराग श्रीवास्तवले स्वागत गरेका थिए ।
आज उनी उच्चस्तरीय भेटमा व्यस्त रहने बताइएको छ । दुई देशको आपसी हित, सहकार्य तथा थप सम्बन्ध विस्तारका विषयमा उनको यो भेट केन्द्रित रहेको छ । राणा भदौ ६ मा स्वदेश फर्कनेछिन् ।
