![](https://newspolar.com/wp-content/uploads/2024/08/anirudh.jpg)
एजेन्सी । टेलिभिजनको लोकप्रिय रियालिटी शो बिग बोस आफ्नो १८ औँ सिजन लिएर फर्किने भएको छ । शोको ग्राण्ड प्रिमियर अक्टोबर ५ मा हुँदैछ, जसमा प्रतियोगीहरुको नाम सार्वजनिक हुँदैछ ।
हालैको बिग बोस खबरको रिपोर्ट अनुसार कलर्स च्यानलले सामाजिक सञ्जालमा आफ्नो बयानका कारण चर्चामा रहेका बाबा अनिरुद्ध आचार्यलाई बिग बोस १८ को लागि अफर गरेको थियो ।
तर, बाबाले शोको प्रस्तावलाई अस्वीकार गरेको खबर पनि आएको छ । यसअघि बाबा अनिरुद्ध कलर्स च्यानलको शो लाफ्टर शेफको हिस्सा भइसकेका छन् ।
साथै, पछिल्ला केही दिनदेखि चर्चित अभिनेत्री ईशा कोप्पिकर बिग बोस १८ को हिस्सा बन्ने खबर आएको थियो तर अभिनेत्री आफैंले सामाजिक सञ्जाल पोस्टमार्फत यी खबरलाई अफवाह भनेकी छिन् ।
अभिनेत्रीले यी समाचारको स्क्रिनसट सेयर गर्दै लेखिन्, ‘फेक न्यूज अलर्ट । कृपया समाचार प्रकाशित गर्नु अघि कलाकारसँग तथ्य जाँच गर्नुहोस् ।’
‘तारक मेहता का उल्टा चश्मा शो’का अभिनेता गुरुचरणलाई शोबाट अफर आएको खबर छ । यद्यपी यसबारेमा अहिलेसम्म आधिकारिक जानकारी आएको छैन । उनी बाहेक जेनिफर मिस्त्री पनि शोमा आउने सम्भावना छ ।
बिग बोस ओटीटी ३ केही समय अघि समाप्त भएको छ, जसको विजेता साना मकबुल थिइन् । ओटीटी सिजनको अन्त्य पछि, अब बिग बोस १८ को तयारी भव्य रुपमा हुँदैछ ।
अप्रिलमा सलमान खानको बान्द्रा अपार्टमेन्टमा गोली चलेको थियो, त्यसपछि सुरक्षाका कारण उनले शो होस्ट नगर्ने खबर आएको थियो, तर अब सलमान शोका लागि आएका छन् । मुनवर फारुकीले बिग बोस १७ को गत सिजनको उपाधि जितेका थिए ।