काठमाडौं। एभरेष्ट बैंकले पुस २७ गते वार्षिक साधारणसभा गर्ने तय भएको छ । उक्त सभाले १०.५३ प्रतिशत लाभांश प्रस्ताव पारित गर्नेछ। बैंकले ५ प्रतिशत बोनस सेयर र ५.५३ प्रतिशत नगद लाभांश प्रस्ताव गरेको छ। बोनस सेयर पारितपछि चुक्ता पुँजी ४२ करोड ३५ लाख रुपैयाँले बढ्ने छ।
बैंकले प्रस्ताव गरेको लाभांश अहिलेसम्मकै कम हो। यद्यपी एभरेष्टले हरेक वर्ष लाभांश वितरण गर्दै आएको छ। बैंकले यो अवधिमा एक पटक ३३.३३ प्रतिशत हकप्रद सेयर वितरण गरेको थियो।एभरेष्टले पछिल्लो १० वर्षमा ७० प्रतिशतसम्म पनि लाभांश वितरण गरेको छ।
एभरेष्टले गत वर्ष एक अर्ब ३६ करोड ८५ लाख रुपैयाँ वितरणयोग्य नाफा गरेको थियो। चालु वर्षको पहिलो त्रैमासमा बैंकको नाफा १३ करोड ५९ लाख रुपैयाँ छ। गत वर्ष यो बेलाको नाफा ३० करोड ८४ लाख रुपैयाँ थियो। कोभिडका कारण ब्यापार ब्यवसाय समस्यामा गएको र राष्ट्र बैंकले पनि ऋण भुक्तानीमा केही नरम नीति लिएका कारण बैंकको नाफा उल्लेख्य घटेको हो।
कम्पनीको ३० प्रतिशत सेयर सर्वसाधारणमा रहेको छ। संस्थापक सेयरधनीतर्फ भारतको पञ्जाब नेशनल बैंकको हिस्सा २०.०३ प्रतिशत छ। यसबाहेक प्रतिमा श्रेष्ठको १४.९१, बीके श्रेष्ठको ९.१८, होटल स्नो लायन प्रालिको ९.३१ प्रतिशत सेयर छ।
