चितवन । सिमलताल दुर्घटनाको अध्ययन गर्न बनेको कार्यदलले तोकिएको समयभित्र काम गर्न नसकेपछि सरकारसँग म्याद थपको लागि अनुरोध गरेको छ ।
सरकारले भरतपुर महानगरपालिका–२९ अन्तर्गत नारायणगढ–मुग्लिन खण्डको सिमलतालमा लेदोसहितको पहिरोले बगाई त्रिशूली नदीमा दुईवटा बस बेपत्ता भएका घटनाको तथ्य पत्ता लगाउन साउन ३१ गते कार्यदल बनाएको थियो ।
गृह मन्त्रालयका सहसचिव छवि रिजालको संयोजकत्वमा ११ दिनको कार्य समय लिएर कार्यदल बनाएको थियो । समितीले प्रतिवेदन समयभित्र बुझाउन नसकेपछि म्याद थपिदिन माग गरेको हो ।
कार्यदल संयोजक रिजालका अनुसार कार्यदलले स्थलगत अध्ययन र हराइरहेका यात्रुका आफन्त, दुर्घटनामा बाँचेका तीनजनासँग कुराकानी गरिसकेको छ । उनले आफूहरूले प्रतिवेदन बुझाउने म्याद थप माग गरेपनि आइतबार वा सोमबारसम्म प्रतिवेदन बुझाउने जानकारी दिए ।
गत असार २८ गते सिमलतालबाट त्रिशूली नदीमा दुई वटा बस खस्दा ६२ जना यात्रु त्रिशूलीमा बेपत्ता भएका छन् । उनीहरुमध्ये २५ जनाको मात्रै शब फेला परेको छ ।
