काठमाडौँ । पूर्व भूमिसुधार राज्यमन्त्री रामचन्द्र रायको हत्या सहयोगीले गरेको प्रहरीको निष्कर्ष छ ।
पूर्वराज्यमन्त्री राय साउन ७ गते सर्लाहीको चन्द्रपुर गाउँपालिका–१ रतनपुरस्थित आफ्नै घरमा मृत फेला परेका थिए ।
अनुसन्धानको क्रममा घरमा सहयोगीको रूपमा कार्यरत २१ वर्षीय राम उजेन रायले उनको हत्या गरेका खुलेको छ । आरोपी राम उजेनले प्रहरीसँग हत्या गरेको स्वीकारेका छन् ।
पूर्वमन्त्रीले गाली गरेपछि आवेशमा हत्या हुन गएको उनले बयानमा बताएका छन् । राम उजेनले आफू राज्यमन्त्री रायसँगै बस्दै आएको र घरको काम बिगारेको भन्दै गाली गरेपछि आवेशमा फर्सेले हिर्काएर हत्या गरेको बताएका छन् । साथै उनले ,घटना हुनुअघि राति घरमा ३ जना मानिसहरू आएको र पूर्वराज्यमन्त्रीको आग्रह अनुसार आफूले ओछ्यान मिलाइदिएको पनि बताएका छन् ।
यद्यपी, पोलिग्राफ परीक्षण गर्दा उनले झुट बोलेको देखिएको जिल्ला प्रहरी कार्यालय सर्लाहीका एक जना अधिकृतले बताए ।
