एजेन्सी । दोस्रो टी–२० खेलमा जिम्बावेलाई १०० रनले पराजित गर्दै भारतले सिरिज १–१ को बराबरी गरेको छ ।
हरारे स्पोर्ट्स क्लबमा भएको उक्त खेलमा भारतका अभिषेक शर्माले शतक प्रहार गरेपछि टोलीले २३४ रन बनाएको थियो । जवाफमा जिम्बाब्वेले १३४ रन मात्र बनाउन सक्यो ।
अभिषेक शर्माले ४७ बलमा १०० रनको इनिङ खेले । उनी जिम्बाब्वे विरुद्ध टी–२० मा शतक बनाउने पहिलो भारतीय बनेका छन् । यस टोलीविरुद्ध सञ्जय मांजरेकरले टेस्टमा र कपिल देवले एकदिवसीयमा पहिलो शतक बनाएका थिए । अभिषेकले ऋतुराजसँग कीर्तिमानी साझेदारी पनि गरेका छन् ।
भारतले टी–२० खेलमा ३४ औं पटक २०० भन्दा बढी रन बनायो । टोलीले टी–२० खेलको अन्तिम १० ओभरमा सर्वाधिक रन बनाउने विश्व कीर्तिमान पनि बनाएको छ ।
भारतले अन्तिम १० ओभरमा १६० रन बनाएको छ, जुन कुनै पनि टी–२० अन्तर्राष्ट्रियको अन्तिम १० ओभरमा सबैभन्दा उच्च स्कोर हो । यसअघि सन् २००७ मा श्रीलंकाले केन्याविरुद्ध १५९ रन बनाएको थियो ।
