एजेन्सी । ११६ रनको लक्ष्य पछ्याएको विश्व च्याम्पियन भारत १०२ रनमा अलआउट, त्यो पनि जिम्बाब्वे जस्तो टोलीविरुद्ध । यो अचम्मको कुरा हो, तर भारत–जिम्बाब्वे टी–२० सिरिजको पहिलो खेलमा शनिबार यस्तो भएको हो ।
गत साता टी–२० विश्वकप जितेको भारत १३ रनले पराजित भएपनि यस टोलीमा विश्व च्याम्पियन टोलीका कुनै सदस्य थिएनन् ।
हरारे स्पोर्ट्स क्लबमा भारतका युवा कप्तान शुभमन गिलले टस जितेर बलिङ रोजेपछि जिम्बाब्वेले २० ओभरमा ९ विकेट गुमाएर ११५ रन बनाएको थियो । जवाफमा भारत १९.५ ओभरमा १०२ रनमा अलआउट भयो । जिम्बाब्वेको यो भारतमाथि तेस्रो जित हो । यो जितसँगै आयोजक टोलीले ५ खेलको सिरिजमा १–० को अग्रता बनाएको छ ।
यो खेलले ८ वर्षअघि भएको खेलको याद दिलायो, जसमा भारत २ रनले पराजित भएको थियो । उक्त खेलमा कप्तान महेन्द्र सिंह धोनीले अन्तिम ओभरमा ७ रन बनाउन सकेका थिएनन् ।
कप्तानले अलराउन्डर प्रदर्शन गरे । उनी खेल्न बाहिर निस्कँदा टोलीले ४० रनमा दुई विकेट गुमाइसकेको थियो । यस्तो अवस्थामा सिकन्दर रजाले तेस्रो विकेटका लागि माधवरेसँग ११ रन र डियोन मायर्ससँग चार विकेटका लागि २३ रनको साझेदारी गरे ।
सिकन्दरले १९ बलमा एक छक्का र एक चौकाको मद्दतले १७ रन बनाए । त्यसपछि बलिङमा कप्तान शुभमन गिललाई आउट गर्दै खेलको पुनरागमन गराए । उनले ४ ओभरमा २५ रन दिएर तीन विकेट लिए । उनी खेलको प्लेयर अफ द म्याच घोषित भए ।
भारतीय कप्तान शुभमन गिलको विकेट खेलको टर्निङ प्वाइन्ट बनेको थियो । उनी ३१ रन बनाएर छैटौं ब्याट्सम्यानका रुपमा आउट भए । गिल आउट हुँदा भारतीय टोलीले ५८ बलमा ६९ रन बनाउनुपर्ने थियो र ४ विकेट बाँकी थियो । गिल आउट भएपछि जिम्बाब्वेका बलरहरु हावी भए ।
जिम्बाब्वे भ्रमणलाई ध्यानमा राख्दै भारतले ३ खेलाडीलाई डेब्यु क्याप दिएको छ । ओपनर अभिषेक शर्माले ४ बल खेलेर पनि खाता खोल्न सकेनन् । चौथो नम्बरमा आएका रियान पराग ३ बलमा २ रन बनाएर आउट भए । जबकि विकेटकिपर ध्रुव जुरेलले १४ बलमा ६ रन मात्र बनाउन सके ।
भारतका तीनै डेब्यु गरेका ब्याट्सम्यानले मिलेर १० रन पनि बनाउन सकेनन् । जसका कारण भारतमाथि दबाब परेको थियो र टोलीले ४३ रनमा ५ विकेट गुमाएको थियो । कप्तान शुभमन गिल एक छेउमा उभिए, तर उनले कसैको समर्थन पाएनन् । उनी पनि ११ औं ओभरमा सिकन्दर रजाको शिकार बने, उनले ३१ रन बनाए ।
