एजेन्सी । भारतको उत्तर प्रदेशको हाथरस जिल्लाको सिकन्दराउ शहरको फुलराई गाउँमा मंगलबार एउटा ठूलो दुर्घटना भएको छ ।
यहाँ भोले बाबाको सत्संग चलिरहेको थियो । सत्संग सकिएपछि यहाँबाट भीड निस्कन थालेपछि भागदौड मच्चिएको बताइएको छ । यस भागदौडमा महिला र बालबालिका नराम्ररी कुचिएका थिए । घटनास्थलमा चिच्याहट भएको थियो ।
दुर्घटनामा धेरैको ज्यान जाने सम्भावना रहेको छ । घाइतेहरूलाई मेडिकल कलेज एटामा पठाइएको छ, अहिलेसम्म ५० जनाको मृत्यु भएको भारतीय सञ्चारमाध्यमले जनाएका छन् । यो संख्या अझै बढ्न सक्छ । मुख्यमन्त्री योगीले दुर्घटनाको जानकारी लिएका छन् ।
एटाका एसएसपी राजेश कुमार सिंहका अनुसार हाथरस जिल्लाको सिकन्दराउ सहरमा धार्मिक कार्यक्रम चलिरहेको बेला भागदौड भएको थियो ।
दुर्घटनालाई आफ्नै आँखाले देखेकी युवतीले सत्संगमा ठूलो भीड जम्मा भएको बताइन् । सत्संग सकिएपछि त्यहाँबाट मानिसहरू जान थाले । यसैबीच बाहिरिने हतारमा भागदौड मच्चियो ।
मानिसहरूले एकअर्कालाई हेरिरहेका थिएनन् । महिला र केटाकेटीहरू लडिरहेका थिए । भीड उनीहरूमाथि दौडिरहेको थियो । बचाउने कोही थिएन । चारैतिर कोलाहल थियो ।
भागदौडमा कैयौं घाइते भएका छन् । सबैलाई उपचारका लागि एटा मेडिकल कलेजमा लगिएको छ ।
