काठमाडौं । राष्ट्रिय स्वतन्त्र पार्टीका महामन्त्री मुलुक ढकालले पार्टी संकटतर्फ धकेलिएको निष्कर्ष निकालेका छन् । महामन्त्री ढकालले प्रदेश खारेजीको पक्षमा पार्टी उभिनुपर्ने तथ्यसहितको प्रतिवेदन पनि बुझाएका छन् ।
स्थापनाको छोटो समयमै संघीय संसद्का २१ सिट जित्न सफल राष्ट्रिय स्वतन्त्र पार्टी संकटतिर धकेलिएको प्रतिवेदन महामन्त्री ढकालको प्रतिवेदनमा उल्लेख छ । महामन्त्री ढकालले वैकल्पिक राजनीतिक शक्तिका रुपमा उदाएको रास्वपा र सभापति रवि लामिछानेको लोकप्रियता खस्किँदै गएको ‘विश्लेषण प्रतिवेदन’ हिजो पार्टी सभापति समक्ष बुझाएका हुन् ।
प्रतिवेदनमा गठनको दुई वर्षमै पार्टी तत्कालीन ‘विवेकशील’ कै बिजोग अवस्थामा पुग्न लागेको निष्कर्ष सुनाएका हुन् । पार्टीप्रति विगतमा जस्तो उत्साह थियो, त्यो अहिलेको अवस्था घट्दै गएको र आकर्षणसमेत कम देखिएको प्रतिवेदनमा उल्लेख गरेका छन् ।
ढकालले देश दौडाहापछि प्रतिवदेन तयार पारेका हुन् । उनले सहकारी प्रकरणले मात्रै नभएर पार्टीले गरेका वाचा पूरा नगर्दा पनि जनतामा निराशा बढेको बताएका छन् ।
रास्वपाले पछिल्लो सयम ‘मिसन—०८४’ अभियान चलाइरहेको छ । रास्वपाका केही नेताले पार्टी २०८४ मा पहिलो बन्ने बताइरहेका छन् । तर उता महामन्त्री ढकालले भने सभापति लामिछाने र रास्वपा दुवैको जनमत निरन्तर ओरालो लागेको देखेको प्रतिवेदन दिएका हुन् ।
उनले ‘समीक्षा यात्रा’ टुंग्याएर तयार पारेको‘विश्लेषण प्रतिवेदन’ सभापति लामिछानेलाई बुझाएका हुन् । उनले २०८४ मा पहिलो दल बन्ने नभई रास्वपा विघटनतिर जान सक्ने चेतावनी दिएका हुन् ।
महामन्त्री ढकालले देश यात्राका क्रममा २ हजार ५०० सर्वसाधारणसँग कुराकानी गरेको जनाएका छन् । उनले जेठ ६ गतेदेखि असार ६ गतेसम्म ३९ जिल्लाका नेता–कार्यकर्तासँग संवाद गरेका थिए ।
