काठमाडौँ । काठमाडौँ महानगरपालिकाले आगामी आर्थिक वर्षका लागि २५ अर्ब ७० करोड ६३ लाख २५ हजार रुपैयाँ बराबरको बजेट घोषणा गरेको छ ।
सोमबार आयोजित १५ औँ नगरसभाको बैठकमा उपप्रमुख सुनिता डंगोलले बजेट पेश गरेकी हुन् ।
चालु आर्थिक वर्ष २०८०र०८१ का लागि महानगरले २५ अर्ब ५४ करोड ७८ लाख २० हजार रुपैयाँ बराबरको बजेट प्रस्तुत गरेको थियो ।
आगामी आर्थिक वर्षका लागि ११ वटा महानगर गौरवको आयोजनालाई ३ अर्ब ८० करोडको बजेट छुट्याइएको उपप्रमुख डंगोलले बताईन् । यस्तै, ३० वटा स्वर्णिम योजनाका लागि २ अर्ब बजेट विनियोजन गरिएको छ ।
पूर्वाधार विकासमा लागि १४ अर्बभन्दा बढी रकम छुट्याइएको छ भने सामाजिक विकासका लागि ३ अर्बभन्दा बढी छुट्याइएको छ । महानगरले सुशासनका लागि १ अर्ब ८९ करोड भन्दा बढी विनियोजन गरेको छ ।
आगामी आर्थिक वर्षको सञ्चितकोषमा २४ अर्ब २० करोड आम्दानी हुने प्रक्षेपण गरिएको छ ।
