काठमाडौं । हातमा कालोपट्टी बाँधेर सङ्घीय संसद्का कर्मचारीहरू आन्दोलनमा उत्रिएका छन् । केहीदिनयता विभिन्न मागसहित आन्दोलन गरिरहेका कर्मचारीहरूले लिखित सम्झौता नभएसम्म आन्दोलन जारी राख्ने बताएका छन् ।
कर्मचारीहरूको आन्दोलनका कारण बिहान ११ बजे बोलाइएको संसद बैठक प्रभावित भएको छ ।
आज बिहान बालुवाटारमा बसेको बैठकले संघीय संसद सचिवालयका कर्मचारीहरुको माग सम्बोधनका लागि सहजीकरण गर्न कानुन, न्याय तथा संसदीय मामिलामन्त्री पदम गिरीको संयोजकत्वमा समिति गठन गरेको थियो ।समितिमा संसद सचिवालयका महासचिव पद्मप्रसाद पाण्डे र अर्थ मन्त्रालयका सचिव मधु मरासिनी सदस्य छन् ।
सरकारले कर्मचारीका लागि माग संशोधनका लागि सहजीकरण समिति बनाउँदैमा आन्दोलन नरोकिने बताउदै उनीहरु आन्दोलनमा उत्रिएका हुन् । यसअघि कर्मचारीले असार ७ गतेसम्म माग सुनुवाइ नभए तेस्रो चरणको आन्दोलन थाल्ने घोषणा गरेका थिए ।
अतिरिक्त समयमा काम गरेको पारिश्रमिक, तलब भत्ता, आवास भत्ता, शैक्षिक भत्ता वृद्धि लगायतका ११ बुँदे माग राख्दै संसद् सचिवालयका कर्मचारीहरू जेठ ३० गतेदेखि आन्दोलनमा छन् ।
