काठमाडौं । नेपालमा विकसित पछिल्लो राजनीतिक घटनाक्रमले नेकपामा विग्रह आउने निश्चित देखेपछि चीन सरकारको सन्देश ल्याएर आएका थिए चिनियाँ कम्युनिष्ट पार्टीका भाइस मिनिस्टर गुओ याङ्चु । उनको नेतृत्वमा आएको चिनियाँ प्रतिनिधिमण्डलले हालै नेपालका राष्ट्रपति विद्या भण्डारी, प्रधानमन्त्री केपी ओली र नेकपाका अरु नेताहरुसँग भेटवार्ता गरेको थियो । त्यस भेटवार्ताका क्रममा के कस्ता कुरा भए भन्ने विषयमा नेपाली सञ्चारमा खासै त आएन, तर जाने बेलामा उनीहरुले नेकपाका नेताहरुलाई सके पार्टी एकताबद्ध राखी मिल्नु र नसके सरकारमा सहकार्य गर्नु भनेको भने आयो ।
उनीहरुले खास महत्व दिएर दुई जना नेता पुष्पकमदल दाहाल प्रचण्ड, अर्का नेता माधव नेपाल र प्रधानमन्त्री केपी ओली । सबैभन्दा पहिला उनले प्रचण्डसँग कुरा गरेका थिए । पार्टीमा देखिएको फुटको अवस्थाका बारेमा नै उनीहरुको चासो थियो किनभने उनीहरुलाई चिनियाँ राष्ट्रपति सि चिनफिङले यही असाइन्मेन्ट दिएर पठाएका थिए । उनको पहिलो प्रश्न थियो– ह्वाट इज योर मिटिङ प्वाइन्ट ? अर्थात् ओलीसँग मिलेर जानका लागि प्रचण्डलाई केले गर्दा सजिलो पर्छ भनी ती नेताले सोधेका थिए । अनि प्रचण्डको सहजै जवाफ आयो– संसदको पुनस्थापना । प्रचण्डको विचार थियो कि अहिलेलाई संसद पुनस्थापनाका लागि ओलीले पहल गरेभने पार्टी एक नै नभए पनि सरकारमा मिलेर जान सक्ने अवस्था रहनेछ ।
त्यसपछि सो टिमले नेकपाका वरिष्ठ नेता (हालै दाहाल नेपाल समूहले पार्टी अध्यक्ष बनाएका) माधव नेपाललाई भेटेका थिए । माधव नेपालसँग पनि उनीहरुको प्रश्न भने उनी थियो– ‘ह्वाट इज योर मिटिङ प्वाइन्ट विथ मिस्टर ओली ?’ यो प्रश्नमा नेपालको जवाफ पनि उही थियो कि संसदको पुनस्र्थापना । अहिलेको लागि सबैभन्दा उचित निकास भनेको संसदको पुनस्र्थापना हो । यो विषयमा स्वयं ओली नै लाग्नुपर्छ र त्यसपछि मात्र नेकपा पनि एक रहन्छ र उनीसँग मिलेर जाने बारेमा हामीले मोडालिटी बनाउने छौँ ।
त्यो टोलीले प्रधानमन्त्री ओलीलाई भेट्यो । ओलीसँग बालुवाटारमा भएको करिब ३८ मिनेटको भेटका क्रममा शुरुमा त चीन नेपाल सम्बन्धका कुरा भए । त्यसपछि बिआरआइ प्रोजेक्ट कार्यान्वयनमा नेपालले के गरिरहेको छ भनेर औसत चिनियाँले सोध्ने स्वाभाविक प्रश्न सोधे । यस विषयमा नेपाल प्रतिबद्ध रहेको रेडिमेड जवाफ प्रधानमन्त्रीले दिए । त्यसपछि चिनियाँ राष्ट्रपति सि चिनफिङले नेपाल भ्रमणका क्रममा हस्ताक्षर गरिएका आयोजनाहरुको कार्यान्वयनको अवस्थाका बारेमा कुराकानी भए ।
तर यी औपचारिकतापछि चिनियाँ टोलीको खास एजेण्डा त बाँकी नै थियो नेकपा पार्टी एकीकरण र सरकारको । त्यसपछि सो टोलीले प्रचण्ड र माधव नेपालसँगको कुराकानी सुनाए । उनीहरुले संसदको पुनस्र्थापना गर्ने हो भने त्यसबाट आफूहरु मिलेर जान सक्ने स्पष्ट कुरा गरेको प्रधानमन्त्रीलाई सुनाए । त्यसपछि प्रधानमन्त्रीले भने– अब त्यो मेरो काबुबाट बाहिर गैसक्यो । प्रधानमन्त्रीको भनाई थियो कि त्यो एजेण्डा अब राजनीतिक एजेण्डा रहेन, सर्वाेच्च अदालतमा पुगेको छ, मैले गरेर हुदैन ।
