बर्दिया । बर्दिया राष्ट्रिय निकुञ्ज क्षेत्रबाट बाघले मोटरसाइकलमा सवार एक महिलालाई थुतेर लगेको छ। कैलालीको लम्किचुहा नगरपालिका ४ कौवापुर की ५० बर्षीया नन्दकली थापालाई बाघले मोटरसाइकलबाटै थुतेर लगेको हो ।
जिल्ला प्रहरी कार्यालय बर्दियाका प्रहरी प्रवक्ता डिएसपी योगेन्द्र खड्काका अनुसार निकुञ्ज क्षेत्रबाट मोटरसाईकलबाटै थुतेर लगेकी महिलाको अवस्था हालसम्म अज्ञात रहेको छ। मोटरसाइकल उनका २२ वर्षीय छोरा सन्तोष थापाले चलाएका थिए।
गुडिरहेको मोटरसाइकलबाट बाघले आमालाई लगेपछि सन्तोष भागेर निकुञ्जका सुरक्षाकर्मीलाई खबर गरेको डिएसपी खड्काले बताए। उनलाई सामान्य चोट लागेको छ।
थापा शुक्रबार राति १० बजेतिर भुरीगाउँबाट चिसापानीतर्फ जाँदै गरेको सु.प.प १००८ प. ६८०१ नम्बरको मोटरसाइकलको पछाडि सवार थिइन्।
घटनास्थल पूर्वपश्चिम राजमार्ग अन्तर्गत निकुञ्जभित्र पर्ने नेपाली सेनाको अम्रेनी चेक पोष्टभन्दा करिब ५-६ किलोमिटर पश्चिममा रहेको जिल्ला प्रहरी प्रवक्ता खड्काले जानकारी दिए।
