जनकपुर । मधेश प्रदेशमा सरकार परिवर्तन गर्न गठबन्धन दलहरुलाई हतार देखिएको छ । मुख्यमन्त्री सरोजकुमार यादवले बुधबार विश्वासको मत लिने तयारी गरिरहँदा गठबन्धन दलहरुले नयाँ सरकार गठनका लागि प्रदेश प्रमुखसमक्ष ध्यानाकर्षण पत्र बुझाउने तयारी गरेका हुन् ।
नेकपा एमाले, नेकपा माओवादी केन्द्र, जनमत, नेकपा एकीकृत समाजवादीसहितका दलले प्रदेश प्रमुखलाई नयाँ सरकार गठनका लागि ध्यानाकर्षण पत्र बुझाउने तयारी गरेका हुन् । जसपा नेतृत्वको सरकार अल्पमतमा रहेकाले नयाँ सरकार गठनका लागि आह्वान गर्न बहुमत सांसदको हस्ताक्षरसहित प्रदेश प्रमुख सुमित्रा भण्डारीलाई ध्यानाकर्षण पत्र बुझाउने तयारी ती दलले गरेका हुन् ।
त्यसो त जेठ १७ गते नै एमाले, नेकपा माओवादी केन्द्र र जनमत पार्टीबीच नयाँ सरकार गठनको सहमति भएको थियो । तर त्यसमा नेकपा एकीकृत समजावादी सहभागी थिएन । अहिले एकीकृत समाजवादी पनि नयाँ सरकार गठनमा सहमत भएको हो । अब लोकतान्त्रिक समाजवादी पार्टी र अरु केही साना दलहरुको समर्थनमा बहुमत पेश गर्ने तयारी गठबन्धनले गरेको हो ।
हुन त अहिलेसम्म लोसपा अनिर्णित छ । तर लोसपा गठबन्धनमा सहभागी नभए पनि एकीकृत समाजवादीसहितका केही साना दलको समयोगमा नयाँ समीकरण बन्न सक्ने देखिएको छ । योसँगै सरोजकुमार यादव नेतृत्वको मधेस प्रदेश सरकार ढल्ने छ ।
१०७ सदस्यीय मधेश प्रदेशसभामा सभामुखबाहेक नेकपा एमालेका २४, जनमत पार्टीका १३, माओवादी केन्द्रको ९ र एकीकृत समाजवादीका ७ सांसद छन् । यो संख्या ५३ पुग्छ । १–१ सिट भएको नागरिक उन्मुक्ति पार्टी र नेपाल संघीय समाजवादी पार्टीमध्ये एउटालाई मात्र जोडे पनि सरकारका लागि आवश्यक पर्ने बहुमत संख्या ५४ पुग्छ ।
बहुमतसहित ध्यानाकर्षण पत्र बुझाए मुख्यमन्त्री यादव विश्वासको मत नलिँदै नैतिकताको आधारमा राजीनामा दिन दबाब पुग्ने उनीहरुको दाबी छ ।
