एजेन्सी । शुक्रबार कन्याकुमारीस्थित विवेकानन्द रक मेमोरियलमा भारतीय प्रधानमन्त्री नरेन्द्र मोदीको ध्यानको दोस्रो दिन हो ।
बिहान ध्यान गरिरहेको उनको तस्बिर सार्वजनिक भएको छ । उनले भगवा लुगा, हातमा रुद्राक्ष माला र निधारमा तिलक लगाएको देख्न सकिन्छ ।
उनले सूर्यलाई अर्घ्य दिए, मन्दिरको परिक्रमा गरे र ध्यान आसनमा बसे । प्रधानमन्त्री विवेकानन्द रक मेमोरियलमा जुन १ गते बिहान १० बजेसम्म रहनेछन् ।
अर्कोतर्फ विपक्षीले मोदीको ध्यानलाई आचारसंहिताको उल्लंघन भनेका छन् । तमिलनाडु कांग्रेसले प्रधानमन्त्रीले आफ्नो पदको दुरुपयोग गरेको आरोप लगाएको छ । यसविरुद्ध मद्रास उच्च अदालतमा याचिका दायर गरिएको छ ।
प्रधानमन्त्री मोदी बिहीबार साँझ कन्याकुमारी पुगेका थिए । सर्वप्रथम भगवतीदेवी अम्मान मन्दिरमा दर्शन र पूजा गरिएको थियो । मोदीले पूजाको क्रममा सेतो मुन्डु (दक्षिण भारतको लुगा) र सल लगाएका थिए । पुजारीहरुले उनको विशेष आरती गरेका थिए । प्रसाद, शाल र देवीको तस्विर उनलाई दिए ।
तमिलनाडु कांग्रेस कमिटीले मद्रास उच्च अदालतमा दायर गरेको याचिकामा भनिएको छ ‘विवेकानन्द रकको प्रधानमन्त्रीको भ्रमणमा कसैले आपत्ति गर्न सक्दैन, तर लोकसभा चुनाव २०२४ को ७ औं चरणको कूलिंग अवधिमा उनको भ्रमण एक प्रयास हो । हिन्दू भावना भड्काएर आफ्नो आधिकारिक पदको दुरुपयोग भोट प्राप्त गर्ने प्रयास हो । त्यसैले यसमा कारबाही हुनुपर्छ ।’
निर्वाचनका क्रममा प्रधानमन्त्रीको ध्यानयात्रामा निर्वाचन ऐनमा कुनै प्रतिबन्ध छैन । निर्वाचन आयोगले २०१९ को लोकसभा चुनावमा पनि प्रधानमन्त्रीलाई यस्तै अनुमति दिएको थियो ।
