एजेन्सी । सन् २०२४ को टी–२० विश्वकप अघि अभ्यास खेलहरु भइरहेका छन् । सहआयोजक राष्ट्र वेस्ट इन्डिजले अभ्यास खेलमा अस्ट्रेलियालाई पराजित गरेको छ ।
पहिले ब्याटिङ गरेको वेस्ट इन्डिजले निकोलस पूरनको विस्फोटक इनिङ्सको आधारमा २५७ रन बनाएको थियो । यसपछि लक्ष्य पछ्याउने क्रममा अस्ट्रेलिया २२२ रनमै सीमित भयो ।
अष्ट्रेलियाका कप्तान मिचेल मार्सले टस जितेर पहिले बलिङ गर्ने निर्णय लिएका थिए । वेस्ट इन्डिजको सुरुवात खराब रह्यो । शाई होप मात्र १४ रन बनाएर सुरुमै आउट भए । जोन्सन चार्ल्स र निकोलस पूरनले दोस्रो विकेटका लागि ३९ बलमा ९० रनको साझेदारी गरे । निकोलस पूरनले उत्कृष्ट इनिङ खेले ।
पुरनले २५ बलमा ७५ रनको उत्कृष्ट इनिङ खेले । यस अवधिमा पुरनले ५ चौका र ८ छक्का प्रहार गरे । चार्ल्स ४० रन बनाएर आउट भए भने कप्तान रोभम्यान पावेल ५२ रन बनाएर आउट भए । शिमरोन हेटमायरले अविजित १८ रन खेले भने शेर्फेन रदरफोर्डले १८ बलमा अविजित ४७ रनको द्रुत इनिङ्स खेले । अष्ट्रेलियाका एडम जाम्पाले दुई विकेट लिए । एस्टन अगर र टिम डेभिडले एक–एक विकेट लिए ।
अष्ट्रेलियाका लागि जोस इंग्लिसले ५५, नाथन एलिसले ३९, एस्टन अगरले २८, टिम डेभिड र म्याथ्यु वेडले २५–२५ रनको इनिङ खेले भने एडम जाम्पाले अविजित २१ रन बनाए । निर्धारित २० ओभरमा अष्ट्रेलियाले ७ विकेट गुमाएर २२२ रन मात्र बनाउन सकेपछि वेस्ट इन्डिज ३५ रनले विजयी भयो ।
वेस्ट इन्डिजका लागि अल्जारी जोसेफ र गुदाकेश मोतीले समान २–२ विकेट लिए । यस्तै, ओवेड म्याककोइ, समर जोसेफ र अकिल हुसेनले १–१ विकेट लिए ।
