काठमाडौँ । संसदको गतिरोध अन्त्य लगायतको विषयमा छलफल गर्न सत्ता र प्रतिपक्षी दलबीच बालुवाटारमा बैठक बसिरहेको छ ।
सरकारले भोलि बजेट ल्याउँदै छ । यसै सन्दर्भमा त्यसअघि नै नेपाली कांग्रेससँग सहमतिको प्रयासका लागि प्रधानमन्त्री पुष्पकमल दाहाल ‘प्रचण्ड’ले बैठक बोलाउनु भएको हो ।
सहकारी प्रकरणमा गृहमन्त्री रवि लामिछानेको नाम उल्लेख गरेर संसदीय छानबिन समिति बनाउनुपर्ने अडानबाट कांग्रेस पछि हट्न सकेको छैन । सत्तापक्ष भने रविको नाम उल्लेख नगर्ने पक्षमा छ ।
बालुवाटारभित्र प्रधानमन्त्रीले सत्ता र प्रतिपक्षीका नेतासँग छुट्टाछुट्टै पनि छलफल गरिरहेको बताइएको छ ।
जारी बैठकमा प्रधानमन्त्री प्रचण्ड, नेपाली कांग्रेसबाट पूर्णबहादुर खड्का, कृष्ण सिटौला, गगन थापा, रमेश लेखक, ज्ञानेन्द्रबहादुर कार्की, जीवन परियार, एमालेबाट कानूनमन्त्री पदम गिरी, महेश बर्तौला, माओवादीबाट अर्थमन्त्री वर्षमान पुन, हितराज पाण्डे, रास्वपाबाट सभापति रवि लामिछाने, स्वर्णीम वाग्ले, सन्तोष परियारलगायत सहभागी छन् ।
