काठमाडौँ । क्रिकेटर सन्दीप लामिछानेलाई अमेरिकी दूतावासले भिसा दिन अस्वीकार गरेको छ ।
सन्दीपले उच्च अदालतबाट सफाइ पाइसकेका छन् भने उनी टी–२० विश्वकप खेल्न अमेरिका र वेस्ट इन्डिज जाने तयारीमा छन् । तर, उनले अमेरिकी दूतावासबाट भिसा पाउन नसकेको भन्दै सामाजिक सञ्जालमार्फत जानकारी गराएका छन् ।
यसअघि २०१९ मा पनि आफूले यस्तै समस्या झेल्नुपरेको भन्दै उनले नेपाल क्रिकेट संघ (क्यान)लाई ध्यानाकर्षण समेत गराएका छन् ।
टी–२० विश्वकप जुन २ देखि सुरु हुँदैछ । नेपालले पहिलो खेल जुन ४ मा नेदरल्यान्ड्सविरुद्ध खेलेर विश्वकपको सुरुवात गर्दैछ । यस समूह डी मा नेपाल र नेदरल्यान्ड्ससँगै बंगलादेश, श्रीलंका र दक्षिण अफ्रिका रहेका छन् ।
