काठमाडौँ । इंग्लिस प्रिमियर लिग फुटबलमा लिभरपुल र एस्टन भिल्लाले बराबरी खेलेका छन् ।
गएराति एस्टन भिल्लाको घरेलु मैदान भिल्ला पार्कमा भएको खेलमा दुबै टोलीले ३–३ गोलको बराबरी खेल्दै अंक बाँडेका हुन् । खेलको दोस्रो मिनेटमा नै लिभरपुलले खेलमा अग्रता लिएको थियो ।
हार्भी इलिओटले क्रस गरेको बल भिल्लाको डिफेन्डरलाई लागेर गोलकिपर इमिलियानो मार्टिनेजको हातमा पुगेको थियो । मार्टिनेजले बल फुत्काउँदै आत्मघाती गोल गर्न पुगे । यता, १२ औं मिनेटमा योरी टिलेमान्सले गोल गर्दै भिल्लालाई १–१ गोलको बराबरीमा ल्याए ।
२३ औं मिनेटमा कोडी गाक्पो र ४८ औं मिनेटमा जारेल एमोरिन क्वान्शाहले गोल गर्दा लिभरपुल ३–१ गोलले अघि रह्यो । तर, ८५ औं र ८८ औं मिनेटमा जोन डुरान एक्लैले दुई गोल गर्दै भिल्लालाई ३–३ को बराबरीमा ल्याउँदै हारबाट जोगाए ।
यो नतिजासँगै लिभरपुल ३७ खेलबाट ७९ अंकका साथ तेस्रो स्थानमा तथा ६८ अंकका साथ एस्टन भिल्ला चौंथो स्थानमा छ ।
