विराटनगर । कोशी प्रदेशको मुख्यमन्त्रीमा नेकपा एमाले संसदीय दलका नेता हिक्मतकुमार कार्की दाबी पेश गर्दै हुनुहुन्छ । प्रदेश प्रमुखले संविधानको धारा १६८ को उपधारा ५ अनुसार सरकार गठनको आह्वान गरेपछि एमाले र माओवादी केन्द्रका ५२ जना प्रदेशसभा सदस्यको समर्थनमा कार्कीले दाबी पेश गर्न लाग्नुभएको हो ।
एमाल र माओवादी केन्द्रले संविधानको धारा १६८ को उपधारा २ अनुसार बहुमतको सरकार बनाउने कसरत गरे पनि प्रदेश प्रमुखले उपधारा ५ अनुसार सरकार गठन गर्न आह्वान गरेपछि त्यही अनुसार कार्कीले दाबी पेश गर्न लाग्नुभएको हो ।
प्रदेश प्रमुख पर्शुराम खापुङले बुधबार मध्यरातमा दुई दिनको समय दिएर संविधानको धारा १६८ को उपधारा ५ अनुसार सरकार गठनको आह्वान गर्नुभएको हो । २७ असोजमा केदार कार्की सरकार गठनको अन्तिम विकल्प उपधारा ५ अनुसार नै मुख्यमन्त्री नियुक्त हुनुभएको थियो ।
नेपाली कांग्रेसका ८ सांसदसहित विद्रोह गरेका केदार कार्कीलाई एमालेका ३९ सांसदले समर्थन गरेको थियो । त्यसबेला पनि प्रदेश प्रमुख खापुङले सांसदको हस्ताक्षर सनाखत गरी कार्कीलाई नियुक्ति दिलाउनुभएको थियो ।
हिक्मत कार्की यसअघि दुई पटक मुख्यमन्त्री भइसक्नुभएको छ । २९ पुस २०७९ पहिलो पटक माओवादी केन्द्र, जसपा र राप्रपाको समर्थनमा मुख्यमन्त्री बनेका कार्कीले केन्द्रमा सत्ता समीकरण फेरिएपछि १४ असार २०८० मा राजीनामा दिनुभएको थियो ।
सर्वाेच्च अदालतको परादेशपछि २२ भदौ २०८० मा ठूलो दलको नेताको हैसियतमा मुख्यमन्त्री बनेका कार्कीले २० असोजमा राजीनामा दिनुभएको थियो । केन्द्रमा पुन: एमाले र माओवादी केन्द्रको गठबन्धन बनेपछि कार्की तेस्रो पटक मुख्यमन्त्री बन्न लाग्नुभएको हो । दाबी पेश गरेलगतै समर्थकको सनाखत गराएर प्रदेश प्रमुखले मुख्यमन्त्री नियुक्त गर्नुहुने छ ।
उपधारा ५ अनुसार सरकार गठन आह्वान भएका कारण दाबी पेशपछि प्रदेशसभा सदस्यको हस्ताक्षर सनाखत गर्ने तयारी रहेको छ । ९३ सदस्यीय कोशीको प्रदेशसभामा बहुमतका लागि ४७ मत चाहिन्छ । कार्कीलाई एमाले र माओवादी केन्द्रका ५२ सांसदको समर्थन छ ।
मुख्यमन्त्री केदार कार्की सर्वोच्च जाने
प्रदेश प्रमुखले नयाँ सरकार आह्वान गरेपछि कामचलाउ बनेका मुख्यमन्त्री केदार कार्की भने सर्वाेच्च अदालत जाने तयारीमा लाग्नुभएको छ ।
एउटा सरकार हुँदाहुँदै प्रदेशप्रमुखले नयाँ सरकार गठन आह्वान गरेकाले त्यो खारेज गरी आफूलाई नै मुख्यमन्त्री कायम गर्ने मागदाबी सहित केदार कार्की अदालत जान लाग्नुभएको हो ।
