काठमाडौँ । राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले कर्णालीका जनतालाई रेल र सुरुङ मार्ग नभइ सडक चाहिएको बताउनुभएको छ ।
बिहीवारको पूर्वाधार विकास समितिको बैठकमा बोल्दै उहाँले यस्तो बताउनुभएको हो । उहाँले मन्त्री र सरकारले बजेट दिन नसके सरकारबाट हटेर मार्ग प्रशस्त गर्न आग्रह गर्नुभयो । उहाँले कर्णालीको नाग्म हुँदै रारा जाने बाटो पिच गर्न माग गर्नुभयो । उहाँले सरकारको कुर्सीमा बसेर बजेट छैन र दिन्न भन्न नमिल्ने बताउनु भयो ।
उहाँले भन्नुभयो, ‘६ किलोमिटर बाटो धौधौ गरी पिच गरेको छु । अहिले अब बजेट माग्यो भने बजेट छैन भन्छन् । सरकार छोड्नुस् न त हमी चलाउँछौँ । छैन भने सरकार छोड्नुपर्यो नि त । बजेट छैन भनेर हामीलाई गाली गरेर हुन्छ ? कहाँबाट ल्याउनुपर्ने हो, के गर्नुपर्ने हो । सरकारको कुर्सीमा बस्ने अनि बजेट नदिने हुन्छ । मन्त्रालयमा गयो कर्मचारीहरुको त्यस्तै छ । एउटा फाइल ६ महिनाअघि बनाउ भनेको अहिलेसम्म बनाउँदैन । यताको फाइल उता, उताको यता । हामी कार्यालयको सहयोगी जस्तो यता र उता फाइल बोकेर हिँड्नुपरेको छ । यहाँ सुरुङ मार्ग, रेलका कुराहरु आए । आकाशे पुलका कुरा आए । हामीलाई सुरुङ मार्ग, रेल चाहिएको छैन, कर्णालीलाई सडक चाहिएको छ ।’
सांसद शाहीले सुर्खेतबाट नाग्म हुँदै जुम्ला सदरमुकाम जोडिने बाटो बन्नुपर्ने बताउनु भयो । उहाँले पहुँचका आधारमा बजेट विनियोजन भए संसद, सडक र मन्त्रालय घेर्न तयार रहेको बताउनु भयो ।
