काठमाडौं । नेकपा एमालेका नेता भीम रावलले अध्यक्षमा केपी ओलीसँग प्रतिस्पर्धा गरेकै कारण आफूलाई पार्टीको राष्ट्रिय महाधिवेशनमा निषेध गरिएको बताएका छन्।
रिपोर्टस क्लबमा आयोजित पत्रकार सम्मेलनमा बोल्दै उनले अब आफू राजनीतिको एउटा घुम्तीमा पुगेको बताए।
उनले भने,‘गोदावरीको अधिवेशनमा उहाँहरूले जुन प्रकारको व्यवहार गर्नुभएको छ । मैले के सोचेको छु भने राजनीतिक जीवनको एउटा मोडमा धकेलिएको जस्तो महसुस भएको छ ।’
उनले आफूलाई पार्टीबाट धकेल्ने प्रयास भइरहेको बताउदै भने, एमालेको गोदावरी बैठकमा जबज र एमालेको परम्परा विपरीत कसैलाई निषेध गर्ने, र महाधिवेशनमा उम्मेदवार बनेको कारणले प्रतिशोध साध्नेबाहेक केही पनि होइन। त्यसलाई मैले गम्भीर रूपमा लिएको छु।’
घुम्तीमा पुगिसकेपछि सामान्य मान्छे पनि मोडतिर लाग्न सक्ने बताउदै उनले भने, ‘एउटा घुम्तीमा पुगेको जस्तो मैले महसुस गरेको छु । त्यो घुम्ती पुग्दा जोसुकै पनि अर्को मोडमा लाग्न सक्छ। भविष्यमा त्यो मोड कस्तो हुने छ भन्ने कुरा फेरि बताउने नै छु ।’
