काठमाडौं । नेपालले कतारका अमिर अमिर शेख तमिम बिन हमाद अल थानीलाई दिने भनिएका दुई वटा हात्ती तत्काल नजाने भएका छन् ।
कतारका अमिरलाई उपहार स्वरुप दिन भनेर चितवनमा दुई वटा हात्ती रुद्रकली र खगेन्द्रप्रसादलाई तयारी अवस्थामा राखिएको थियो ।
कानुनी तथा प्राविधिक प्रक्रिया पुरा नभएका कारण नेपालले उपहार स्वरूप दिइने रूद्रकली र खगेन्द्रप्रसाद तत्काल कतार नजाने भएका हुन् ।
कतार पठाउनका लागि नेपालका तर्फबाट सबै तयारी पूरा भए पनि कतारका तर्फबाट कानुनी तथा प्राविधिक कुरा नमिलाएको कारण कतारका अमिरसँगै ती हात्ती नपठाइएको हो ।
नेपाल र कतारबीच भएको दुई पक्षीय सहमतिमा पनि हात्ती उपहारको एजेन्डा राखिएको थिएन । कतारबाट प्रक्रिया पूरा हुन बाँकी रहेकाले दुई पक्षीय सहमतिमा यो विषय नसमेटिएको हो ।
हात्ती दुर्लभ वन्यजन्तु तथा वनस्पतिको अन्तर्राष्ट्रिय व्यापार महासन्धि (साईटीस) को अनुसूचीमा सूचीकृत छ । सो महासन्धिमा नेपालले पनि हस्ताक्षर गरेको छ । कतारलाई हात्ती दिने विषयमा साइटिसले पनि सिफारिस गर्नुपर्छ ।
वन मन्त्रालयका अनुसार त्यहाँबाट पनि कुनै सिफारिस आइपुगेको छैन । साईटीसबाट कतारले सिफारिस ल्याउनुपर्ने भए पनि त्यसबारे कुनै पहल देखिएको छैन ।
