काठमाडौँ । वि.सं. २०७२ साल वैशाख १२ गते गएको गोरखा भूकम्पको सम्झनामा वृहत फोटो प्रदर्शनी गरिएको छ ।
खानी तथा भूगर्भ विभाग र सम्भायिका समाज नेपालको संयुक्त आयोजनामा विभागको प्राङ्गणमा २०७२ साल वैशाख १२ गते गएको गोरखा भूकम्पको सम्झनामा वृहत फोटो प्रदर्शनी गरिएको हो । प्रदर्शनीमा ०७२ सालमा गोरखा भूकम्पका क्रममा खिचिएका फोटोहरु राखिएको थियो । साथै अघिल्लो वर्ष जाजरकोट र बझाङमा गएको भूकम्पका क्रममा खिचिएका र संकलन गरिएका फोटोहरु पनि प्रदर्शनीमा राखिएको थियो ।
प्रदर्शनीमा सञ्चारकर्मीहरुसँग कुराकानी गर्दै खानी तथा भूगर्भ विभागका वरिष्ठ भूकम्पविद् डा. लोकविजय अधिकारीले भूकम्पलाई बिर्सिने गरिएको भन्दै विगतमा भूकम्पले गरेका क्षति देखाउँदै यसप्रति सचेत गराउनका लागि प्रदर्शनी गरिएको बताउनु भयो । उहाँले नेपाल भूकम्पको जोखिममा रहेको देश भएको भन्दै यो कुरालाई बुझाइराख्न र भूकम्प प्रतिरोधी संरचना निर्माणका लागि सचेत गराउनका लागि फोटो प्रदर्शनी गरिएको बताउनु भयो ।
उहाँले भन्नुभयो – ‘विद्यालयका पाठ्यक्रमहरुमा भूकम्प सम्बन्धी शिक्षा करिव करिव राखिएकै छैन जस्तो छ । यिनै कुराहरुलाई मध्येनजर गर्दाखेरी कम्तिमा हामीले हाम्रो देश भूकम्पीय जोखिममा छ । जहाँ जहिल्यै, जतिसुकै बेलामा पनि ठूला भूकम्प जान सक्छन् । साना गइरहेका छन् । अत्यन्त जोखिम भएको अवस्थामा हामी सुसुचित नभएसम्म हामीले बनाउने संरचना सुरक्षित हुँदैनन् । र हामी त्यसबाट जोगिन सक्दैनौँ । भुकम्पको क्षति ठूलो हुन्छ भन्नेकुरालाई मध्येनजर गरेर ०७२ सालमा गोरखाको भूकम्पमा खिचिएको फोटोहरु जुन अहिलेसम्म प्रकाशित भएका थिएनन् तिनै फोटाहरु । खानी विभागकै प्राविधिकहरु फिल्डमा जाँदाखेरी जाजरकोट भुकम्प, बझाङ भुकम्प लगायतका स्थानमा संकलन गरेका, खिचेका फोटोहरु राखेर सम्भायिका समाज नेपालसँगको संयुक्त आयोजनामा एक दिने वृहत फोटो प्रदर्शनी गरियो । यि फोटाहरुले फेरि हाम्रो मानसपटलमा झक्झकाओस् कि हामी जोखिम ठाउँमा छौँ भनेर ।’
डा. अधिकारीले शहरमा भवन आचारसंहिता अनुरुपको घरहरु बनेपनि गाउँघरमा भने भवन आचारसंहिताको पालना नगरेको देखिएको बताउनु भयो । उहाँले आगामी दिनमा भवन असुक्षित बनाउन नदिन राज्यले सोच्नुपर्ने बताउनु भयो ।
