काठमाडौँ । स्पेनिस फुटबल लिग ला लिगा अन्तर्गत रियल मड्रिडले जित निकालेको छ ।
गएराति भएको ‘एल क्लासिको’मा रियलले चीर प्रतिद्वन्द्वी बार्सिलोनालाई ३–२ गोलले पराजित गरेको हो । रियलको घरेलु मैदान सान्टियागो बर्नबेउमा भएको खेलमा सुरुवाती अग्रता भने बार्सिलोनाले लिएको थियो ।
खेलको छैटौं मिनेटमा नै एन्ड्रीयास क्रिस्टेन्सेनले गोल गर्दै बार्सिलोनालाई सुरुवाती अग्रता दिलाएका थिए । १८ औं मिनेटमा भिनिसियस जुनियरले पेनाल्टीमा गोल गर्दै रियललाई बराबरीमा ल्याए ।
६९ औं मिनेटमा फेर्मिन लोपेजले गोल गर्दै बार्सिलोनालाई २–१ गोलले अघि बढाए । तर, त्यसको चार मिनेट पछि नै अर्थात् ७३ औं मिनेटमा लुकास भाजक्वेजले गोल गर्दै रियललाई २–२ गोलको बराबरीमा ल्याए ।
यस्तै, खेल सकिनै लाग्दा इन्जुरी समयमा जुड बेलिङहमले गोल गर्दै रियललाई ३–२ गोलको जित दिलाए । जितसँगै रियलले दोस्रो स्थानको बार्सिलोनासँग ११ अंकको अग्रता बनाएको छ । ३२ खेलबाट रियलको ८१ तथा बार्सिलोनाको ७० अंक छ ।
