काठमाडौँ । एसिसी प्रिमियर कप क्रिकेट प्रतियोगिताअन्तर्गत नेपालले लगातार चौंथो जित निकालेको छ । ओमानको अल अमेरत खेल मैदानमा भर्खरै सम्पन्न खेलमा नेपालले साउदी अरेबियालाई ६ विकेटले पराजित गर्यो ।
वर्षाले प्रभावित भएपछि २० ओभरबाट आठ ओभरमा झारिएको खेलमा साउदीले दिएको ७४ रनको लक्ष्य नेपालले ७.२ ओभरमा ४ विकेट गुमाएर पूरा गर्यो । नेपालका लागि गुलशन झा १९ बलमा ३२ रनसहित तथा कप्तान रोहित पौडेल ७ बलमा १६ रनसहित अविजित रहे । दिपेन्द्र सिंह ऐरीले ९ बलमा १७ रनको योगदान दिए ।
बलिङतर्फ साउदी अरेबियाका इस्तियाक अहमदले २ तथा उस्मान नजिव र वजी उल हसनले १–१ विकेट लिए ।
त्यसअघि टस हारेर पहिले ब्याटिङ गरेको साउदी अरेबियाले निर्धारित आठ ओभरमा सात विकेटको क्षतिमा ७३ रन बनायो । उसका लागि अब्दुल वाहिदले सर्वाधिक ३७ रन बनाए । उनले १६ बल खेल्ने क्रममा तीन छक्का र तीन चौका प्रहार गरे । त्यसबाहेक अन्य ब्याटरले दोहोरो अङ्कमा रन बनाउन सकेनन् ।
नेपालका लागि करन केसी र अभिनाश बोहोराले दुई/दुई विकेट लिए भने प्रतीस जिसी र ललित राजवंशीले एकरएक विकेट लिए ।
समूह ‘ए’मा रहेको नेपालले यसअघि खेलेको तीन वटै खेलमा जित हात पारेको थियो । नेपालले पहिलो खेलमा मलेसियालाई पाँच विकेट, दोस्रो खेलमा कतारलाई ३२ रन र तेस्रो खेलमा हङकङलाई आठ विकेटले पराजित गरेको थियो ।
