काठमाडौं । सभामुख देवराज घिमिरेले प्रमुख प्रतिपक्षी नेपाली कांग्रेसले सहकारी ठगी प्रकरण छानबिन गर्न संसदीय समिति गठनको माग गर्दै संसदमा अवरोध गरेपछि आज चार दलका शीर्ष नेताहरुको बैठक बोलाएका छन् ।
संसदीय समिति गठन नभए भोलिदेखि प्रतिनिधिसभा बैठक नै चल्न नदिने चेतावनी कांग्रेसले दिएको छ । त्यही विषयलाई लिएर सभामुखले चार दलका शीर्ष नेताहरुलाई बोलाएका हुन् ।
सभामुखले आज साढे १० बजे सभामुखको कार्यकक्ष सिंहदरबारमा शीर्ष नेतालाई छलफलका लागि बोलाएका छन् । माओवादी केन्द्रका अध्यक्ष पुष्पकमल दाहाल, प्रमुख प्रतिपक्ष दलका नेता शेरबहादुर देउवा, नेकपा एमालेका अध्यक्ष केपी शर्मा ओली र रास्वपाका सभापति रवि लामिछानेलाई छलफलका लागि बोलाइएको छ ।
सभामुख घिमिरेले हिजो चार जना नेतासँग टेलिफोनमा कुरा गरेर छलफलको समय निर्धारण गरेका हुन् । गत २१ गतेको प्रतिनिधि सभा बैठकमा नेपाली कांग्रेसले अर्को बैठकमा छानबिन समिति गठन नभए संसद् ठप्प पार्ने अल्टिमेटम दिएको थियो । प्रतिनिधि सभाको अर्को बैठक चैत २७ गते बोलाइएको छ ।
