काठमाडौँ । इंग्लिस प्रिमियर लिग फुटबलमा चेल्सीले बराबरी खेलेको छ । गएराति भएको खेलमो चेल्सीले शेफिल्ड युनाइटेडसँग २–२ गोलको बराबरी खेल्दै अंक बाँडेको हो ।
शेफिल्डको घरेलु मैदानमा सुरुवाती अग्रता भने चेल्सीले लिएको थियो । खेलको ११ औं मिनेटमा टियागो सिल्भाले गोल गर्दै चेल्सीलाई सुरुवाती अग्रता दिलाएका थिए र ३२ औं मिनेटमा जेडेन बोगलीले गोल गर्दै शेफिल्डलाई १–१ को बराबरीमा ल्याए ।
यता, ६६ औं मिनेटमा नोनी माडुकेले गोल गर्दै चेल्सीलाई २–१ ले अघि बढाए । खेल सकिनै लाग्दा इन्जुरी समयमा ओली म्याकबर्नीले गोल गर्दै शेफिल्डलाई २–२ को बराबरीमा ल्याएर हारबाट जोगाए ।
बराबरीसँगै चेल्सी ३० खेलबाट ४४ अंकका साथ १० औं स्थानमा छ भने शेफिल्ड ३१ खेलबाट १६ अंकसहित पुछारमा छ ।
