धनकुटा । धनकुटाको महालक्ष्मी नगरपालिकाका दुई वटा सामुदायिक वनमा भीषण डढेलो लागेको छ । वडा नं. ६ र ७ को सिमानामा पर्ने वनमा बनपाला र छुम्लिङ गाउँको नजिक दुरीमा रहेको गढीसिंहदेवी सामुदायिक वनमा डढेलो लागेको हो ।
डढेलो फैलिँदै गएपछि याङपाङ गाउँसमेत जोखिममा परेको थियो । प्रहरी र स्थानीयको सहयोगमा अग्नीरेखा बनाएर डढेला नियन्त्रणमा लिइएको छ । बजार क्षेत्र नजिकसम्म फैलिएको आगो अहिले नियन्त्रणमा आएको छ । झाँक्री पार्क क्षेत्रमा भने डढेलो नियन्त्रण बाहिर नै छ ।
हिजो दिउँसोदेखि सुरु भएको डढेलो नियन्त्रण बाहिर गएको स्थानीयले बताएका छन् । सामुदायिक वनको डढेलोले नजिकै रहेको काफ्ले गाउँ जोखिममा छ । यस क्षेत्रका करिब ५० घर जोखिममा छन् ।
बाटोको पहुँच नभएकाले दमकल पुर्याउन सकिएको छैन । छुम्लिङ क्षेत्रबाट सुरु भएको डढेलो नजिक रहेको दुई वटा सामुदायिक वनमा सल्किएको थियो । अत्यधिक हावाको कारण आगो नियन्त्रण बाहिर गएको स्थानीयको भनाइ छ ।
